L-UE stabbiliet miri ambizzjużi biex tnaqqas l-emissjonijiet netti bil-għan li ssir l-ewwel kontinent newtrali għall-klima sal-2050.
Għanijiet u stadji importanti dettaljati huma stipulati fl-ewwel Liġi Ewropea dwar il-Klima u fil-pakkett “Lesti għall-Mira ta’ 55 %”, u jistabbilixxu mira inizjali ta’ tnaqqis fl-emissjonijiet ta’ 55 % fl-2030 (meta mqabbel mal-livell fl-1990).
Ikkompilajna informazzjoni dwar kif dan se jkollu impatt fuq it-trasport bl-ajru, u b’mod speċifiku r-rwol importanti li se jkollhom il-fjuwils tal-avjazzjoni sostenibbli.
It-tisħiħ tal-użu tal-SAF fit-trasport bl-ajru
Bħala parti mill-pakkett “Lesti għall-Mira ta’ 55 %”, il-Kummissjoni pproponiet li ttejjeb l-użu tal-fjuwils tal-avjazzjoni sostenibbli (SAF) fit-trasport bl-ajru.
L-SAF għandhom rwol sinifikanti fid-dekarbonizzazzjoni tas-settur, iżda attwalment is-sehem tagħhom fl-avjazzjoni tal-UE huwa negliġibbli.
Tista’ ssib aktar informazzjoni dwar il-Fjuwils tal-Avjazzjoni Sostenibbli, fl-artiklu preċedenti tagħna fuq EASA Light.
It-titjiriet kollha mill-ajruporti tal-UE se jużaw l-SAF
Ir-regoli proposti stabbilew obbligi armonizzati fil-livell tal-UE dwar il-fornituri tal-fjuwil u l-linji tal-ajru sabiex iżidu l-użu tal-SAF, billi introduċew mandat li japplika għat-titjiriet kollha li jitilqu mill-ajruporti Ewropew.
Dan ifisser li kull titjira li titlaq mill-ajruporti l-aktar kbar tal-UE, se ġġorr ammont minimu ta’ SAF, irrelevanti jekk il-linja tal-ajru tkunx linja tal-ajru tal-UE jew le.
It-tabella hawn taħt turi l-miri vinkolanti tal-SAF, li jibdew minn 2 % fl-2025 u jilħqu l-5 % fl-2030.
Sabiex jintlaħqu l-objettivi klimatiċi tal-UE, huwa mistenni li sal-2050, tal-inqas 63 % tal-fjuwil kollu tal-avjazzjoni li jintuża għat-titjiriet li jitilqu minn ajruporti tal-UE għandu jkun SAF.
Fjuwils sintetiċi (jew e-fjuwils) se jkollhom rwol maġġuri fid-dekarbonizzazzjoni tas-suq tat-trasport bl-ajru u għandhom potenzjal enormi. Ir-regoli proposti għaldaqstant jistabbilixxu sottomira biex jiġi żgurat li ċertu ammont ta’ SAF użat ikun fjuwils sintetiċi (ara r-referenza ekoloġika fit-tabella).
Ishma totali fit-taħlita tal-fjuwils
| 2025 | 2030 | 2032 | 2035 | 2040 | 2045 | 2050 | |
| Perċentwal ta’ SAF użat fit-trasport bl-ajru: | 2% | 6% | 6% | 20% | 34% | 42% | 70% |
| Li minnu: Fjuwils sintentiċi (jew e-fjuwils) sottomandati: | - | 0.7% | 1.2% | 5% | 10% | 15% | 35% |
X’tipi ta’ SAFs huma kkunsidrati?
Meta wieħed iħares lejn il-firxa ta’ SAFs u l-materja prima rispettiva tagħhom, ir-regolament jikkunsidra l-kategoriji tal-SAF li ġejjin:
- Dawk l-imsejħa bijofjuwils, li huma fjuwils prodotti minn materja prima elenkata fl-Anness IX, Parti A tad-Direttiva dwar l-Enerġija Rinnovabbli
- Fjuwils prodotti minn materja prima elenkata fil-Parti B
- Fjuwils tal-Avjazzjoni Sintetiċi (Mill-Elettriku għal Fjuwil Likwidu jew e-fjuwils)
Il-fjuwils jeħtieġu wkoll ikunu konformi mal-kriterji ta’ sostenibbiltà u tal-emissjonijiet ta’ gass b’effett ta’ serra stipulati fid-Direttiva dwar l-Enerġija Rinnovabbli.
Fjuwils tal-Avjazzjoni Sintetiċi (jew e-fjuwils)
Il-fjuwils sintetiċi, l-e-fjuwils jew il-fjuwils Mill-Elettriku għal Fjuwil Likwidu (PtL) huma fjuwils magħmula minn sorsi rinnovabbli li mhumiex biomassa, eż. enerġija eolika u solari. Bħala spjegazzjoni bażika, l-enerġija rinnovabbli u l-ilma jintużaw f’elettrolizzatur biex jipproduċu l-idroġenu, li sussegwentement jiġi sintetizzat b’CO2 f’gass sintetiku. Il-gass sintetiku li jirriżulta jkompli jiġi pproċessat fi fjuwil.
Politika fit-tul għal SAF
Peress li dan jirrappreżenta sfida importanti, l-objettiv tar-Regolament propost huwa li jipprovdi politika fit-tul biex jiġi żgurat li s-suq uniku tal-avjazzjoni jkun mgħammar sew għat-taħlit obbligatoru tal-SAF f’pitrolju konvenzjonali u jipprovdi l-ispinta meħtieġa għall-investimenti biex tiżdied il-kapaċità tal-produzzjoni tal-SAF.
Il-kompitu tal-EASA – monitoraġġ u rapportar
Fi ħdan din il-proposta, l-EASA għandha l-kompitu li twettaq kompiti ta’ monitoraġġ u rapportar li se jiżguraw li jintlaħqu l-obbligi u li se jipprovdu għarfien dwar is-suq tal-SAF li dejjem jevolvi u jikber.
Dan ir-regolament se jkun pilastru importanti biex l-avjazzjoni ssir adegwata għall-futur billi jiżgura suq li jiffunzjona sew u li jipprovdi mobilità sostenibbli għall-benefiċċji taċ-ċittadini. Se jpoġġi lill-UE bħala l-mexxej globali dwar il-fjuwils tat-trasport mill-aktar avvanzati u, aktar importanti, se joffri benefiċċji klimatiċi sostanzjali permezz ta’ ffrankar sinifikanti fl-emissjonijiet fis-settur.