Hekk kif l-Ewropej jibdew il-btala tas-sajf tagħhom, u l-ivvjaġġar bl-ajru jerġa’ jissokta wara l-pandemija tal-COVID-19, mhux kull vjaġġ ikun mingħajr xkiel kif tixtieq.
Ir-ritorn lejn il-volumi tal-ivvjaġġar bl-ajru ta’ qabel il-COVID-19 huwa kompitu kumpless u l-EASA qed taħdem mal-linji tal-ajru, l-ajruporti u l-industrija biex tiżgura li t-titjiriet jibqgħu sikuri minkejja dawn l-isfidi.
L-EASA nediet il-Kampanja “Ready to Fly” fi sforz kollaborattiv li jinvolvi organizzazzjonijiet mill-industrija tal-avjazzjoni biex tiffaċilitalek il-vjaġġ tiegħek. Ġbarna flimkien ftit suġġerimenti relatati mal-passi fil-vjaġġ tiegħek. Madankollu, ir-regola ewlenija li għandek tiftakar hija:
Jekk jogħġbok, kun ġentili mal-membri tal-persunal u l-passiġġieri l-oħra kollha
Minkejja li r-restrizzjonijiet tal-COVID ittaffew f’ħafna sitwazzjonijiet, l-Ilbies tal-maskri mediċi għadu l-aħjar mod biex tipproteġi lilek innifsek u lill-oħrajn milli timrad bil-COVID-19 u għalhekk xi pajjiżi u linji tal-ajru jirrikjedu li tilbes il-maskra fuq l-ajruplan u mezzi oħra ta’ trasport. Iċċekkja r-regoli fis-seħħ tul il-passi kollha tal-vjaġġ tiegħek biex tiżgura li tkun ippreparat.
Iċċekkja, Kun af, Aħseb, Mur – suġġerimenti għal ivvjaġġar sikur
L-EASA ġabret flimkien xi suġġerimenti biex tgħin lill-passiġġieri jkollhom vjaġġ sikur u mingħajr xkiel. Agħti ħarsa lejn is-suġġerimenti biex tipprepara għall-vjaġġ tiegħek:
- Lest għall-vjaġġ - Segwi s-suġġerimenti tagħna għal vjaġġ mingħajr xkiel
- Waqt il-vjaġġ - Iċċekkja l-informazzjoni l-aktar reċenti u għin biex jitnaqqas it-tfixkil
- Fl-ajruport - Kun ippreparat għal kull pass li trid tgħaddi minnu fl-ajruport
- Fl-ajruplan - Il-membri tal-ekwipaġġ huma professjonisti mħarrġa sew u responsabbli mis-sikurezza tiegħek, segwi l-istruzzjonijiet tagħhom
Lest għall-vjaġġ
- IĊĊEKKJA r- Re-open EU biex tara liema rekwiżiti tal-ivvjaġġar huma fis-seħħ fil-pajjiż li inti beħsiebek iżżur (ir-rekwiżiti qed jinbidlu b’mod kontinwu, għaldaqstant ippjana minn qabel u erġa’ ċċekkja).
- KUN AF xi trid tipprepara u tieħu miegħek qabel titlaq lejn l-ajruport (il-passaport, il-biljetti tat-titjiriet, id-dokumentazzjoni tal-COVID) u x’tistenna li se ssib fl-ajruport (ikkalkula aktar ħin għal kollox, minħabba għadd potenzjalment inqas ta’ membri tal-persunal).
- AĦSEB dwar it-triq tiegħek lejn l-ajruport (it-trasport pubbliku, fejn se tipparkja), minn liema terminal se titlaq u l-affarijiet li jeħtieġ li tagħmel hekk kif tasal fl-ajruport.
- MUR u kun ippreparat.
Waqt il-vjaġġ
- AGĦMEL CHECK-IN qabel ma tasal fl-ajruport, jekk tkun tista’, anki jekk għad trid tħalli l-bagalji fid-drop-off u pprintja l-karti tal-imbarkazzjoni jew ara li jkollok kopja diġitali jew screenshot tagħhom.
- KUN AF x’ħin trid tasal fl-ajruport - attwalment bejn sagħtejn u tliet sigħat qabel it-tluq jidher li jkun ħin xieraq, iżda jekk tkun f’dubju erġa’ ċċekkja mal-linja tal-ajru tiegħek. Meta passiġġier jasal fl-ajruport ħafna sigħat qabel it-titjira jista’ potenzjalment iżid il-kjuwijiet u l-ħin ġenerali ta’ stennija.
- AĦSEB u itlob l-assistenza tal-ajruport jekk għandek diżabilità ġenwina jew diffikultà relatata ma’ mobilità. Ir-regoli dwar il-likwidi u l-oġġetti perikolużi għadhom japplikaw, għaldaqstant ippjana għal dan ir-rigward.
- MUR u ibda l-vjaġġ tiegħek.
Fl-ajruport
- IĊĊEKKJA liema huwa l-ajruport tat-tluq: minn fejn trid tgħaddi għaċ-check-in, għall-kontrolli tas-sigurtà u għall-gate. L-aktar importanti, ħu ħsieb il-bagalji tiegħek u li għandek id-dokumenti importanti f’kull ħin.
- KUN AF il-ħin tal-imbarkazzjoni tat-titjira tiegħek u agħti biżżejjed ħin biex tgħaddi mill-kontrolli tas-sigurtà u tmur fil-gate.
- AĦSEB dwar kif l-azzjonijiet tiegħek jistgħu jħallu impatt fuq l-oħrajn: il-konsum żejjed ta’ alkoħol mhuwiex idea tajba.
- MUR u żomm lilek innifsek sikur fl-ajruport.
Fl-ajruplan
- IĊĊEKKJA n-numru tal-post tiegħek fuq l-ajruplan u kun af liema huwa l-eqreb bieb tal-ħruġ.
- KUN AF li l-istruzzjonijiet min-naħa tal-ekwipaġġ qegħdin hemm għall-benefiċċju u s-sikurezza tiegħek, kun ċert li ssegwihom.
- AĦSEB u isma’ l-istruzzjonijiet dwar is-sikurezza, l-informazzjoni li tirċievi tista’ ssalvalek ħajtek.
- MURu gawdi l-vjaġġ tiegħek.